Rom 10 | VIV | STEP | Omi tobohiyakweyao Loma againe, yaku nuwanuwa keke kabiꞋona yaku yoꞋo miIsileli adi kibababala hinanuhagana, ada medema faꞋina Yaubada againe gaveꞋoveꞋoꞋola.

a m3Lo 9:31-32

b m82Veh 30:14m11Ais 28:16m12Kl 3:11, Ga 3:28m13Yow 2:32

c m15Ais 52:7m16Ais 53:1m18Sam 19:4m192Veh 32:21

d m20Ais 65:1m21Ais 65:2

Romans 10

MiIsileli yegayega ana eda hifaniyena.

1 Omi tobohiyakweyao Loma againe, yaku nuwanuwa keke kabiꞋona yaku yoꞋo miIsileli adi kibababala hinanuhagana, ada medema faꞋina Yaubada againe gaveꞋoveꞋoꞋola. 2 Badi Yaubada faꞋine hiꞋidibumuhiga ma iya akufaiweya ganaꞋalakakila, tu yadi idibumuhiga keke nuwakaifolega againe gidaveꞋinuba. 3 GavaiyaꞋamine Yaubada kaliva gisedi yegayegadiyao Bana matane ma hifaniyena, hivaitana taudiyao Mosese yana vehimeya hiꞋiꞋidibumuhigena faꞋina hinayegayega Yaubada matane. Medema faꞋina keke Yaubada againe hidahawahegedi be Bana Tauna ginasedi yegayegadiyao Bana matane. 4 Yesu Keliso Mosese yana vehimeya gitubutagona be vehimeyai-nadi ana abavehimeya gihavaina, higa vaita gaveyao Keliso againe hivetumagana, medema Yaubada gisedi yegayegadiyao Bana matane. ^a

Fafali moyaꞋaina kalivai-dina adifaiweya Yaubada againe

hinakova be adi kibababala hinanuhagana.

5 Tu miIsileli hinuwanuwa vaita vehimeya ana dibumuhiga againe Yaubada ginasedi yegayegadiyao Bana matane. Tuwai-moꞋena Mosese mena yegayega ana eda faꞋina giꞋetoladina hidede amine. Gigayo, “Hai kaliva Yaubada yana vehimeya giꞋidibumuhigena, medema yawaina ginanuhagana.” 6 Tu kadu gahe saꞋeyana vaita kaliva yada yegayega inubana Keliso ana vetumagana againe gigayo, “Keke nuwahinageniya unagahe unagayo, Hakwadi lobameya ginalaka be higa Keliso babiya ginaꞋihobuyeni? Hakwadi toꞋalika yadi abageya ginahobu be higa Keliso ginaꞋilakahini?” Keke medede amine unagahe faꞋina Keliso ahe gihobuꞋela kadu alikeya ahe gimididi-havagi. 8 Au hida gahe Veyao Tuwaina ana bukiya gidadauda gigayo,

Yaubada bonana liliniya gidadauda,
e aseꞋaseniya gidadauda kadu awaniya uyakayakahina.
Bonai-nadi ma venuwaꞋata vetumagana faꞋina alulumamalena amanadi. 9 Higa kaꞋi yoꞋo matadiya unahawavemogatala unagayo, Yesu yaku Kaiwabu, kadu aseꞋaseniya unavetumagana vaita Yaubada alikeya gisivemididina, au hidema faꞋina Yaubada ya koyona agaidiya ginakibababale. 10 FaꞋina aseꞋasedeya kavetumaganeni-yo Yaubada giseda yegayegadeyao Bana matane, ada yoꞋo matadiya Yesu kahawavekaiwabuyeni-yo Yaubada yada koyona agaidiya gikibababaleda. 11 Ada yada vetumagana Yesu againe faꞋina Veyao Tuwaina ana buki gigahe gigayo,

Keke tamo hakwadi Bana againe givetumagana-ma ginavetumagana-wayoga.
12 Mena gahe ma fafali moyaꞋaina kalivai-dana faꞋideya gigahe. Ide miYuda faꞋideya kadu omi yoꞋo tulimiyao kalivai-mina faꞋimiya gigahe, faꞋina moyaꞋaida ada ita leleleya Yaubada matane. BanaꞋe ide miYuda yada Kaiwabu kadu omi yoꞋo tulimiyao kalivai-mina yami Kaiwabu. Ada gaveyao moyaꞋaidi Bana againe hikova, medema givelugadi lakahina. 13 Meda anafaiweya Veyao Tuwaina ana buki gigahe gigayo,

Gaveyao moyaꞋaidi Kaiwabu againe hinakova,
medema adi kibababala hinanuhagana. ^b

Keke kanagahe miIsileli fanifanidiyao faꞋina keke

Yesu hidavetumaganeni.

14 Atu kaliva Kaiwabu againe keke hidavetumagana faꞋina gavaimi-yo Bana againe hidakova? Gilubodana be Yaubada bonana ana tolaumamala gidaꞋiveninisedi. Tolaumamala gilubodadi be Kaiwabu faꞋine hidalumamala. Kaliva hinanogalini-yo adifaiweya hinavetumaganena. Yesu againe hinavetumagana-yo adi kibababala faꞋina adifaiweya Kaiwabu againe hinakova. Atu Yaubada tolaumamala ahe giꞋiveninisedi faꞋina Veyao Tuwaina ana buki gigahe gigayo,

Badi venuwaꞋata yamumuna hiꞋaliyena-ma yadi ela gavayamumu!
16 Atu keke miIsileli moyaꞋaidi VenuwaꞋata Yamumuna hidavenogaleni. Meda tuwai-moꞋena toꞋawatalatalaina ana egana Aiseya yana bukiya giꞋetoladina gigayo,

Kaiwabu, ime ya kaliva O bona alumamalena,
tu keke moyaꞋaidi hidavenogaleni.
17 Ada au kahalamanena kaliva yadi vetumagana yana yemu inubana ma au Yaubada yana venuwaꞋata ana nogala againe. Ada Yaubada yana venuwaꞋata ana nogala inubana au tolaumamala Keliso faꞋine hilulumamala.

18 Tu ganatoliyemi hidede amine. KaꞋi miIsileli Keliso ana laumamala hinogalina o kaꞋi keke? Makewa hinogalina ada meda Veyao Tuwaina ana buki gigahe gigayo,

Babi matatabuna hinunuwaliliugina be kaliva tolaumamala agodi hinogalina. E, yadi laumamala fafali moyaꞋaina agaidiya giveꞋaliyahega.
19 Kadu ganatoliluvaluva, kaꞋi miIsileli mena venuwaꞋatai-nadi hihalamanena o kaꞋi keke? Makewa hihalamanena. Nagona Yaubada yana gahe saꞋeyana higa vaita miIsileli halamanidiyao ma Mosese giyakahina be Veyao Tuwaina ana bukiya gidadauda. Bana Yaubada gigayo,

Omi miIsileli badi yoꞋo tulidiyao kalivai-dina faꞋidiya
wagahe wagayo, Badi iyohoyoho au kwavakwavadiyao.
Tu Iya ganagaheyedi ganagayo, Badi yaku yoꞋo kalivai-dina. Medema faꞋina omi wanagaꞋumaꞋuma,
e yaku gahe faꞋina wanaꞋagoꞋuga.
Hidede amine Yaubada gigahe be Mosese giꞋetoladina. 20 Tu muliya Aiseya Yaubada yana gahe toyogina keke yana wamatauta giyakahina yoꞋo tulidiyao faꞋidiya be Veyao Tuwaina ana bukiya gidadauda gigayo,

Badi kaliva keke hidaleleku-ma aku halamana hivaina.
Badi kaliva keke hidaveꞋoꞋoleku-ma agaidiya gahawavemogataleku.
21 Atu Yaubada yana gahe saꞋeyana miIsileli faꞋidiya ma Aiseya giyakahina hidede amine. Gigayo,

Mala gilauna gina mala gibogi nimaku gatunena be ganaꞋatugogodi tu tagadi kuluna, bonaku keke hidavenogaleni.
Hidede amine Yaubada gigahe be Aiseya giꞋetoladina. ^{c
,} ^d